كارەكتەرێ مەجازی د ڕۆمانا (كەف)دا ل گوڕ تیۆرا سیمیۆلۆژییا (فیلیپ ھامۆن)ی

ڕۆمان، وەك ژانرەكێ پەخشانی كۆمەكا كارەكتەران هەيە. كارەكتەرێ مەجازی وەك تێگەھەكێ نوی د ڕەخنەیا سیمیۆلۆژییا ڤەگێڕانێدا ب تایبەتی د تیۆرا (فیلیپ ھامۆن)یدا كەڤتییە بەر ڤەكۆلینێن تیۆری و پڕاكتیكی. كارەكتەرێ مەجازی ھەلگرێ ھەستێن (ئەرێنی و نەرێنی) یێن مرۆڤییە، ئەوێن دەربڕینێ ژ حەز، ڤیان، ھیڤی، كەرب، كین و نە ئارامیێ دكەن، لەوڕا ئەڤ جۆرە سەمتا خواندەڤانێ خۆ پتر بەرەڤ ھزركرن و شرۆڤەكرنێڤە دبەت. ئەڤ جۆرە كارەكتەرە وەك ھەر جۆرەكێ دی ژ ڤالاھیێ ناھێت، بەلكو د بازنا ڤەگێڕانێدا وەك توخمەكێ كارا ب ھەمی توخم و ڕەگەزێن دیڤە گرێداییە، زێدەباری بابەت و چیرۆكا ڕۆمانێ، ب گوتنەكا ڕوھنتر ڕۆلەكێ كارا د تێكستەكا ئەدەبییا پڕی ھەست و ڕامانێن ڤەشارتی و ئاشكرا دگێریت، بێگومان ڕۆمان ئەو تێكستە یا فرەجۆرییا كارەكتەران د ناڤا خۆدا ھەلدگریت. ئەڤ ڤەكۆلینە ھەوڵەكە بۆ بەرجەستەكرن و شرۆڤەكرنا كارەكتەرێ مەجازی د رۆمانا (كەف) یا ڕۆماننڤیس (دیار ئەرەدنی)دا، ئایا كارەكتەرێ ڕۆمانا كەف ھەلگرێ تایبەتمەندیێن كارەكتەرێ مەجازی – ل دویڤ تیۆرا فیلیب ھامۆنی یە؟ ل دویماھیێ گەھشتینە ئەوی ئەنجامی كو؛ لایەنێ كەرب و كین و ڕەشبینی و بێ ھیڤیبوونێ ل دەڤ كارەكتەری جھێ خۆ دایە لایەنێ حەز و خۆشی و ھیڤی و ئارامییێ و د نموونێن پڕاكتیكیدا پتر خۆیا بوو كو ھەر (دالەك – نیشانكارەك) دەلالەتە بۆ (مەدلولەك – نیشانكرییەك)ی.