Appelsínugular viðvaranir vegna veðurs á Íslandi: September 2024–ágúst 2025

Veturinn 2024 til 2025 var í meðallagi þegar kemur að fjölda veðurviðvarana. Gefnar voru út 56 appelsínugular viðvaranir í tengslum við ellefu aðskilin veður. Eitt þeirra veðra var sunnan ofsaveður sem gekk yfir landið í byrjun febrúar 2025, en þá voru einnig gefnar út nítján rauðar viðvaranir. Nánar verður fjallað um það veður í sérstakri skýrslu. Fleiri viðvaranir voru gefnar út en í meðalári sumarið 2025 og voru fjórar appelsínugular viðvaranir gefnar út í byrjun júní 2025. Í þessari skýrslu verður greint frá helstu veðuratburðum og viðvörunum hvers mánaðar á tímabilinu september 2024 til ágústloka 2025. Þau veður sem leiddu til appelsínugulra viðvarana eru rýnd, veðurspár og mælingar bornar saman og áhrif veðranna metin.