O'SMIRLARDA KASB TANLASHGA MUNOSABAT TIZIMI SHAKLLANISHINING IJTIMOIY-PSIXOLOGIK XIZMAT KO'RSATISH MEXANIZMLARI

Mazkur maqolada o‘smirlarda kasb tanlashga munosabat tizimi shakllanishining ijtimoiy-psixologik jihatlari ilmiy asosda tahlil qilinadi. Tadqiqotda o‘smirlik davrida kasbiy yo‘nalganlikning shakllanishiga ta’sir etuvchi asosiy omillar, xususan ijtimoiy muhit, oilaviy tarbiya va ta’lim muassasalarida ko‘rsatiladigan ijtimoiy-psixologik xizmatlarning o‘rni yoritib beriladi. Empirik tadqiqot jarayonida umumta’lim maktablarining 8–10-sinf o‘quvchilari ishtirok etib, ularning kasb tanlashga bo‘lgan munosabati dastlabki va yakuniy bosqichlarda qiyosiy tahlil qilindi. Tadqiqot natijalari ijtimoiy-psixologik xizmatlar o‘smirlarning kasbiy o‘zini anglash darajasini oshirish, mustaqil va ongli kasbiy qaror qabul qilish ko‘nikmalarini rivojlantirish hamda kasb tanlashdagi noaniqlikni kamaytirishda samarali ekanligini ko‘rsatdi. Olingan xulosalar ta’lim muassasalarida kasbiy yo‘naltirishga qaratilgan ijtimoiy-psixologik xizmatlarni tizimli tashkil etish zarurligini asoslaydi.