IJTIMOIY HIMOYAGA MUHTOJ QATLAMNI MUHOFAZA QILISHNI TASHKIL ETIVCHI TUZILMALAR - FONDLAR, TASHKILOTLAR VA DONORLAR

Mazkur maqolada muallif O‘zbekiston Respublikasida ijtimoiy himoyaga muhtoj aholi qatlamini qo‘llab-quvvatlash tizimining shakllanishi, tarixiy asoslari va zamonaviy islohotlarini ilmiy asosda tahlil qiladi. Tadqiqotda mustaqillikning dastlabki yillaridan boshlab ijtimoiy siyosatning rivojlanishi, davlat boshqaruvi darajasida ijtimoiy himoya institutlarining tashkil topishi hamda ularning jamiyatdagi o‘rni ilmiy-nazariy jihatdan yoritiladi. Shuningdek, ijtimoiy yordam ko‘rsatish mexanizmlarining takomillashuvi, “Temir daftar”, “Ayollar daftari”, “Yoshlar daftari” singari tizimlarning shakllanish jarayoni va ularning amaliy samaradorligi tarixiy manbalar, va amaldagi normativ-huquqiy hujjatlar asosida tahlil qilinadi. Maqolada ijtimoiy himoyaga oid davlat organlari, maxsus fondlar, mahalla institutining tarixiy transformatsiyasi hamda nodavlat tashkilotlarning jamiyatdagi ijtimoiy funksiyalari o‘rganilib, ularning O‘zbekistonning sotsial taraqqiyotidagi o‘rni ochib beriladi. Shuningdek, xalqaro donor tashkilotlar — Jahon banki, BMT agentliklari, Yevropa Ittifoqi va boshqa institutlar ishtirokidagi loyihalarning ijtimoiy sohaning modernizatsiyasiga ko‘rsatgan ta’siri ham ilmiy tahlil qilinadi. Tadqiqot natijalariga ko‘ra, O‘zbekiston ijtimoiy himoya tizimining zamonaviy modeli milliy an’ana, huquqiy islohotlar va xalqaro tajriba uyg‘unligi asosida shakllanib borayotgani xulosa qilinadi.