AVTONOM ELEKTR TA'MINOTIGA INTEGRATSIYALASHGAN ELEKTRLI ISSIQ POL TIZIMLARINING ENERGIYA SAMARADORLIGINI OSHIRISH IMKONIYATLARINI TADQIQ ETISH

Maqolada turar-joy binolarida energiya samarador isitish tizimlarini takomillashtirish masalalari, xususan avtonom elektr ta’minoti bilan integratsiyalashgan elektrli issiq pol tizimlarining texnik va energetik samaradorligi tahlil qilinadi. Iqlim o‘zgarishi, energiya resurslarining qimmatlashuvi hamda markazlashgan energiya tizimlariga yuklamaning ortishi sharoitida past haroratli, avtomatlashtirilgan va ekologik toza isitish texnologiyalarini joriy etish zarurati asoslanadi. Xorijiy ilmiy tadqiqotlar asosida pol osti isitish tizimlarining radiatorli va havoli isitish tizimlariga nisbatan energiya sarfi va issiqlik yo‘qotishlari bo‘yicha ustunliklari ko‘rsatib berilgan. Elektr issiq pol tizimlarining fotoelektrik panellar, issiqlik akkumulyatsiyasi va faza-almashuvchi materiallar bilan integratsiyasi energiya iste’molini kamaytirish va issiqlik shinamligini oshirishning samarali usuli ekanligi ilmiy jihatdan tahlil qilingan. Olingan natijalar avtonom elektrli isitish tizimlarini real iqlim sharoitlarida qo‘llashning yuqori istiqbolliligini tasdiqlaydi.