OLMA NAVLARINING IQTISODIY SAMARADORLIGI TAHLILI

Ushbu maqolada Xorazm viloyatining tuproq-iqlim sharoitida 2017-2019 yillar davomida yetishtirilgan mahalliy va introduksiya qilingan 21 ta olma navining iqtisodiy samaradorligi qiyosiy tahlil qilingan. Tahlil natijalariga ko‘ra, kechpishar navlar, xususan, Sarapayan (292,5 s/ga) va Besh yulduz (285,6 s/ga) eng yuqori hosildorlikni namoyish etgan bo‘lsa, iqtisodiy foyda va rentabellik jihatidan So‘x go‘zali (380,8%), Besh yulduz (311,0%) va Rozmarin beliy (305,4%) navlari yetakchilik qilgan. Tadqiqotda xorijiy olimlarning metodologik yondashuvlariga tayangan holda, navlarning pishish muddatlari va bozor kon’yunkturasining sof foyda shakllanishidagi roli ilmiy asoslab berilgan.