ALİ MƏKTƏBLƏRDƏ ADAPTİV ÖYRƏNMƏ PLATFORMALARI ƏSASINDA RƏQƏMSAL BACARIQLARIN TƏDRİSİ METODİKASI

Müasir ali təhsil sistemində rəqəmsal transformasiya prosesi tədris metodlarının yenilənməsini və tələbələrin rəqəmsal bacarıqlarının məqsədyönlü şəkildə inkişaf etdirilməsini zəruri edir. Bu baxımdan adaptiv öyrənmə platformaları fərdiləşdirilmiş təlim imkanları təqdim etməklə təhsil prosesinin səmərəliliyinin artırılmasında mühüm rol oynayır. Məqalədə ali məktəblərdə adaptiv öyrənmə platformaları əsasında rəqəmsal bacarıqların tədrisi metodikası nəzəri və praktiki aspektlərdən araşdırılmışdır. Tədqiqat çərçivəsində adaptiv öyrənmə anlayışının mahiyyəti, onun ali təhsildə tətbiq imkanları və rəqəmsal bacarıqların formalaşmasına təsiri təhlil edilmişdir. Eyni zamanda, adaptiv LMS platformalarının (Moodle və analoji sistemlər) imkanları əsasında fərdiləşdirilmiş tapşırıqların təşkili, diaqnostik qiymətləndirmə mexanizmləri və geribildirim prosesinin tədrisə inteqrasiyası metodik baxımdan əsaslandırılmışdır. Məqalədə təqdim olunan metodika tələbələrin fərdi öyrənmə tempini, bilik səviyyəsini və maraqlarını nəzərə almaqla rəqəmsal kompetensiyaların sistemli şəkildə inkişaf etdirilməsinə yönəlmişdir. Aparılan təhlillər adaptiv öyrənmə platformalarının ali məktəblərdə rəqəmsal bacarıqların tədrisində effektiv pedaqoji vasitə olduğunu göstərir və onların tədris prosesində geniş tətbiqi ilə bağlı praktiki tövsiyələr irəli sürülür.