KAM SUVLIKDA PERINATAL NATIJALAR VA ULARNING METABOLOMIK ASOSI

Homiladorlik davrida amniotik suyuqlik miqdorining kamayishi – oligogidramnioz (kam suvlik) perinatal natijalarga salbiy ta’sir ko‘rsatishi mumkin bo‘lgan muhim akusherlik muammolaridan biridir. Amniotik suyuqlik homilaning normal rivojlanishini ta’minlovchi muhim biologik muhit hisoblanadi. Uning yetishmasligi homila gipoksiyasi, o‘sishning kechikishi, past Apgar ballari va neonatal asoratlar bilan bog‘liq bo‘lishi mumkin. So‘nggi yillarda metabolomika texnologiyalarining rivojlanishi homila va yangi tug‘ilgan chaqaloqlarning metabolik profillarini o‘rganish orqali kam suvlikning patofiziologik mexanizmlarini aniqlash imkonini bermoqda. Ushbu maqolada kam suvlikda kuzatiladigan perinatal natijalar hamda ularning metabolomik asoslari ilmiy adabiyotlar tahlili asosida yoritiladi.