RAQAMLI AKTIVLARNI ER-XOTINNING UMUMIY MULKI SIFATIDA E'TIROF ETISH: NAZARIYA VA AMALIYOT KOLLIZIYASI

Raqamli iqtisodiyotning jadal rivojlanishi mulk tushunchasining an’anaviy huquqiy chegaralarini sezilarli darajada kengaytirmoqda. Kriptoaktivlar, tokenlar, NFTlar, raqamli akkauntlar va boshqa shunga o‘xshash nomoddiy obyektlar iqtisodiy muomalada real qiymatga ega bo‘lib, mulkiy munosabatlarning mustaqil obyektlariga aylanmoqda. Biroq ushbu obyektlarning huquqiy tabiati va ularning an’anaviy fuqarolik hamda oila huquqi institutlari bilan o‘zaro munosabati hali to‘liq shakllanmagan. Er-xotinning umumiy mulki instituti oila huquqining eng muhim va eng ko‘p nizolar keltirib chiqaradigan yo‘nalishlaridan biri hisoblanadi. Sud amaliyoti shuni ko‘rsatadiki, ayniqsa mulkni bo‘lish, kreditorlar talabini qaratish va bankrotlik holatlarida umumiy mulk rejimi bilan bog‘liq muammolar keskinlashadi.