MAISHIY TEXNIKA EKSPORTIDA BARQAROR RIVOJLANISH VA YASHIL SAMARADORLIK MODELI

Zamonaviy global iqtisodiyot sharoitida eksport faoliyati tobora barqaror rivojlanish va yashil iqtisodiyot tamoyillari bilan uzviy bogʻlanib bormoqda. Xalqaro bozorlarda mahsulot raqobatbardoshligi endilikda faqat narx va sifat koʻrsatkichlari bilan emas, balki ekologik barqarorlik, energiya samaradorligi va yashil texnologiyalar darajasi bilan ham belgilanmoqda (UNEP, 2011; World Bank, 2012). Ayniqsa, maishiy texnika sektori global energiya iste'molida muhim ulushga ega boʻlib, ushbu mahsulotlarning ishlab chiqarilishi, ekspluatatsiyasi va utilizatsiyasi ekologik muhitga sezilarli ta'sir koʻrsatadi. Shu sababli maishiy texnika eksportida barqaror rivojlanish tamoyillariga asoslangan yashil samaradorlik modelini shakllantirish zamonaviy iqtisodiy rivojlanishning strategik yoʻnalishiga aylanmoqda (IEA, 2023; OECD, 2022).