RAQAMLI IQTISODIYOT SHAROITIDA TRANSCHEGARAVIY XUSUSIY-HUQUQIY MUNOSABATLARNI TARTIBGA SOLISHNING DOLZARB HUQUQIY MASALALARI

Raqamli texnologiyalarning jadal rivojlanishi natijasida zamonaviy jamiyatda yuzaga kelayotgan iqtisodiy munosabatlar mazmunan va shaklan tubdan o‘zgarib bormoqda. Bugungi kunda elektron savdo, raqamli platformalar, mobil ilovalar, sun’iy intellekt texnologiyalari hamda smart-kontraktlar orqali amalga oshirilayotgan bitimlar iqtisodiy faoliyatning asosiy shakllaridan biriga aylanmoqda. Ushbu jarayonlar transchegaraviy xususiy-huquqiy munosabatlarning ko‘lamini kengaytirib, ularni tartibga solishda xalqaro xususiy huquq normalarining rolini yanada kuchaytirmoqda.