ДЕСТРУКТИВ ҒОЯЛАР ФЕНОМЕНИ ВА ЁШЛАР ОНГИГА ТАЪСИРИ

Мазкур мақолада XXI аср шароитида деструктив ғоялар феномени ва уларнинг ёшлар онгига кўрсатаётган ижтимоий-психологик ҳамда педагогик таъсири комплекс таҳлил қилинган. Жамият ҳаётининг жадал рақамлилашуви ва глобал ахборот маконининг кенгайиши ёшлар дунёқарашида маънавий беқарорлик, идентичлик инқирози ва қадриятлар нисбийлашуви жараёнларини кучайтираётгани илмий асосланади [1]. Тадқиқотда деструктив ғоялар фалсафий нуқтаи назардан инсон маънавий мавжудлигини инкор этувчи, ижтимоий барқарорликни емирувчи мафкуравий ҳодиса сифатида очиб берилган [2]. Психологик таҳлил ёшлар онгида деструктив ғоялар фрустрация, ижтимоий адолатсизликни субъектив қабул қилиш, эмоционал беқарорлик ва танқидий фикрлашнинг етарли даражада шаклланмаганлиги замирида қарор топишини кўрсатади [3]. Айниқса, интернет ва ижтимоий тармоқлар орқали тарқалаётган манипулятив ва радикал контент деструктив қарашларнинг нормаллашувига олиб келаётгани таъкидланади [4]. Мақолада ёшлар маънавий иммунитети тушунчаси илмий жиҳатдан асосланиб, унинг заифлиги девиант хулқ-атвор, радикаллашув ва ижтимоий бегоналашув учун асосий омил экани аниқланади [5]. Шунингдек, деструктив ғоялар таъсирини енгиб ўтиш фақат профилактик ёки ҳуқуқий чоралар билан чекланмаслиги, балки комплекс педагогик реабилитация ва ижтимоий мослаштириш методикаларини ишлаб чиқиш зарурлиги асослаб берилган [6]. Тадқиқот натижалари деструктив ғоялар таъсирига тушган ёшлар билан ишлашда фалсафий-методологик ёндашув, психологик механизмлар ва педагогик технологияларни уйғун қўллаш муҳим аҳамиятга эга эканини кўрсатади. Мақолада келтирилган илмий хулосалар ёшларни ижтимоий мослаштириш ва реабилитация қилишга қаратилган педагогик тизимларни такомиллаштириш учун назарий-амалий асос бўлиб хизмат қилади [7].