Norgga beale oahppoplána doaibmi guovttegielatvuohta – mo dan meroštallat?

Norgga beale oahppoplánaid mielde oahpahusa gielalaš ulbmil lea dahkat ohppiid doaibmi guovttegielagin. Artihkkalis guorahallojuvvo mo doaibmi guovttegielatvuođa sáhttá meroštallat. Skuvlla giellaoahpahusa vuođđun lea normerejuvvon giella, mii geavahuvvo oahppogirjjiin. Dákkár normatiiva oainnu mielde guovttegielat olbmo giellamáhttu dábálaččat buohtastahttojuvvo ovttagielat olbmo giellamáhtuin ja danin guovttegielasteapmi dahje kodamolsun dábálaččat ii adnojuvvo vuogas giellageavaheapmin. Artihkkalis guorahallojuvvo maiddái mo guovttegielat olbmo giellamáhttui gullá heivvolaš gulahallandilálašvuođas sáhttit guovttegielastit. Loahpas gieđahallojuvvo vel matematihkkaoahpahusa giella, man birra ságastallojuvvo dávjá sihke skuvllas ja maiddái mediain.