„Ekki gæluverkefni heldur nauðsyn“ – Mannlegar frásagnir, fagleg vinnubrögð og samfélagslegur ávinningur í Ljósablaðinu 2025

Lokaverkefni þetta felst í ritstjórn og útgáfu Ljósablaðsins 2025 fyrir endurhæfingarmiðstöðina Ljósið, ásamt fræðilegri greinargerð. Markmið verkefnisins var að miðla upplýsingum um heilbrigðis- og endurhæfingarmál af fagmennsku með vinnubrögðum tímaritablaðamennsku í stafrænu formi. Verkefnið byggir á hugmyndafræði um blaðamennsku innan almannaheillasamtaka (e. NGO journalism) og nýtir sjónræna framsetningu til að auka aðgengi og dýpt efnisins. Helstu niðurstöður sýna að hægt er að stunda faglega blaðamennsku og taka sér hlutverk erindreka breytinga (e. agent of change) innan félagasamtaka án þess að fórna ritstjórnarlegu sjálfstæði. Afurðin staðfestir mikilvægi þess að gefa persónulegum frásögnum rými og tíma í stafrænu umhverfi.